*आगामी निवडणुकीत मनसेच्या पाठीशी खंबीरपणे उभे रहा  -  दिलीप धोत्रे* *परभणी जिल्ह्यातील शेकडो युवकांचा मनसेत प्रवेश*

पंढरपूर (प्रतिनिधी)

राज्यात येत्या काही दिवसांत स्थानिक स्वराज्य संस्थेच्या निवडणूका होणार आहेत. यामध्ये जिल्हा परिषद, पंचायत समिती, महानगरपालिका, नगरपालिका या निवडणुकांचा समावेश आहे. या सर्व निवडणुका मनसे लढवणार असून सर्वांनी जोमाने कामाला  लागावे, असे आवाहन परभणी येथील कार्यकर्त्यांच्या मेळाव्यात , मनसे नेते दिलीप धोत्रे यांनी केले. यावेळी परभणी जिल्ह्यातील अनेक ग्रामपंचायत सदस्य, तसेच शेकडो युवकांनी मनसेत प्रवेश केला.

राज्यभरात मनसेकडून मेळावे आयोजित केले जात आहेत . परभणीतही बी. रघुनाथ सभागृहात कार्यकर्ता आणि पदाधिकारी मेळावा आयोजित करण्यात आला होता. राज्यातील तीन पक्षीय महाविकास आघाडी सरकारने आणि केंद्रातील भाजपा सरकारने कोरोना काळात जनतेला वाऱ्यावर सोडून दिले.  या काळात राज्य आणि केंद्र सरकारकडून सामान्यांना काहीच दिलासा मिळाला नाही. फायनान्स कंपन्या आणि बँकेकडून होणाऱ्या छळवणूकीबाबत सरकारने काहीच केले नाही. महावितरणकडून अनेक घरगुती तसेच शेतीचे वीज कनेक्शन तोडण्यात आले. त्यावरही सरकारकडून शेतकऱ्यांना, सर्वसामान्य जनतेला दिलासा मिळाला नाही.केंद्र सरकारनेही मदत केली नाही . खाजगी हॉस्पिटलमध्ये दाखल असलेल्या कोरोना रुग्णांना लाखो रुपये खर्च करावे लागले, याबाबत देखील केंद्र आणि राज्य सरकारने काही केले नाही याबाबत धोत्रे यांनी जोरदार टीका केली.
 येत्या निवडणुकीत जनता भाजप, शिवसेना, काँग्रेस तसेच राष्ट्रवादी यांना धडा शिकवल्याशिवाय राहणार नाही असे मत त्यांनी व्यक्त केले.

कोरोनाच्या काळात राज्यात सर्वच ठिकाणी महाराष्ट्र नवनिर्माण सेनेच्या कार्यकर्त्यांनी, स्वतःच्या जीवाची पर्वा न करता जनतेला मदत केली, पूरग्रस्तांना मदत केली, त्यामुळे जनतेचा महाराष्ट्र नवनिर्माण सेनेला भरभरून आशीर्वाद मिळेल , असा विश्वास धोत्रे यांनी व्यक्त केला. याप्रसंगी मनसेचे प्रदेश सरचिटणीस संतोषभाऊ नागरगोजे, राज्य उपाध्यक्ष अशोक तावरे, सुमित खांबेकर, मराठवाड्यातील सर्व जिल्हा अध्यक्ष, परभणी जिल्ह्यातील सर्व पदाधिकारी उपस्थित होते.