*आ. समाधान आवताडे यांनी राबविला  स्तुत्य उपक्रम* *पंढरीत गुणवंत विद्यार्थ्यांचा केला सन्मान* *पुढील शिक्षणासाठी माजी सनदी अधिकारी इंद्रजित देशमुख यांनी केले मार्गदर्शन*

पंढरपूर/प्रतिनीधी

पंढरपूर मंगळवेढा मतदारसंघाचे आमदार समाधान आवताडे यांच्या संकल्पनेतून स्व. महादेवराव अवताडे प्रतिष्ठान मंगळवेढा यांच्या वतीने पंढरपूर मंगळवेढा मतदारसंघातील इयत्ता दहावी आणि बारावी मध्ये घवघवीत यश मिळवलेल्या विद्यार्थ्यांचा गुणगौरव सोहळा आणि मार्गदर्शन शिबिर आयोजित करण्यात आले होते.
 
पंढरपूर येथील श्रेयस पॅलेस येथे आयोजित केलेल्या या कार्यक्रमाच्या अध्यक्षस्थानी प्रसिद्ध व्याख्याते व माजी सनदी अधिकारी इंद्रजीत देशमुख हे होते . यावेळी बक्षीस वितरण आ. समाधान आवताडे यांच्या हस्ते संपन्न झाले. यावेळी मंचावर पंढरपूरचे उपविभागीय अधिकारी सचिन इथापे ,तहसीलदार सचिन लंगोटे, पंढरपूर नगरपरिषदेचे मुख्याधिकारी प्रशांत जाधव, वरिष्ठ पोलीस निरीक्षक विश्वजीत घोडके, गटविकास अधिकारी सुशील संसारे व गटशिक्षणाधिकारी मारुती लिगाडे आदी मान्यवर उपस्थित होते. 
या कार्यक्रमात दहावी आणि बारावी मध्ये यश मिळवलेल्या विद्यार्थ्यांना स्कूल बॅग व सन्मानचिन्ह देऊन मान्यवरांच्या हस्ते सत्कार करण्यात आला.
    यावेळी विद्यार्थ्यांना मार्गदर्शन करताना इंद्रजित देशमुख यांनी सध्याच्या सोशल मीडियाच्या जमान्यात विद्यार्थ्यांनी आपला कल ओळखून आपले करिअर घडवावे. पालकांनी विद्यार्थ्यांना कोणताही दबाव न आणता त्यांच्या कौशल्याप्रमाणे विकसित होऊ द्यावे. इत्यादी विविध विषय पालक आणि विद्यार्थी यांना समजावून सांगितले. 
      यावेळी आपल्या ग्रामीण भागात देखील अनेक विद्यार्थी गुणवान आहेत त्यांना योग्य संधी मिळाल्यास ते विविध क्षेत्रात मोठे यश संपादन करू शकतात त्यामुळे त्यांच्या पाठीवर कौतुकाची थाप टाकणे आपली कर्तव्य आहे यासाठी हा कार्यक्रम आयोजित केल्याचे आमदार समाधान आवताडे यांनी  बोलताना सांगितले. या कार्यक्रमासाठी पालक आणि विद्यार्थी मोठ्या संख्येने उपस्थित होते.