*जिल्हा परिषद राबवणार स्वतंत्र शिष्यवृत्ती योजना*  *धोकादायक शाळांचे तातडीने उपाय योजनांचे निर्देश* :*शिक्षण समिती  सभापती चेतनसिंह केदार-सावंत यांच्याकडून सूचना*

माढा /प्रतिनिधी 

जिल्ह्यातील विद्यार्थ्यांना सुरक्षित वातावरणात दर्जेदार शिक्षण मिळावे, तसेच ग्रामीण भागातील गुणवंत विद्यार्थ्यांना शिक्षणासाठी आर्थिक पाठबळ मिळावे, यासाठी जिल्हा परिषदेच्या शिक्षण समितीच्या सभेत अनेक महत्त्वपूर्ण निर्णय घेण्यात आले. सहकार महर्षी श्री. गणपतराव साठे जिल्हा परिषद प्रशाला, माढा येथे शिक्षण समितीची सभा मा. सभापती श्री. चेतनसिंह केदार-सावंत यांच्या अध्यक्षतेखाली संपन्न झाली.

या सभेत जिल्ह्यातील शाळांच्या पायाभूत सुविधा, विद्यार्थ्यांची सुरक्षा, शिक्षकांची उपस्थिती, शैक्षणिक गुणवत्ता, डिजिटल शिक्षण तसेच गुणवंत विद्यार्थ्यांसाठीच्या शिष्यवृत्तीबाबत सविस्तर चर्चा करण्यात आली.

जिल्ह्यातील ज्या शाळांच्या इमारती जुन्या अथवा धोकादायक झाल्या आहेत, त्यांचे तातडीने स्ट्रक्चरल ऑडिट करून आवश्यक त्या उपाययोजना करण्याचे निर्देश सभापतींनी शिक्षण विभागाला दिले. विद्यार्थ्यांच्या सुरक्षिततेच्या बाबतीत कोणतीही तडजोड खपवून घेतली जाणार नाही, असे त्यांनी स्पष्ट केले.

ग्रामीण भागातील गरीब, होतकरू आणि गुणवंत विद्यार्थ्यांना उच्च शिक्षणासाठी आर्थिक मदत मिळावी, यासाठी जिल्हा परिषद स्वतःची स्वतंत्र शिष्यवृत्ती योजना राबवणार असल्याची महत्त्वपूर्ण घोषणा या सभेत करण्यात आली. या योजनेमुळे आर्थिक अडचणींमुळे शिक्षणात अडथळे येणाऱ्या गुणवंत विद्यार्थ्यांना मोठा आधार मिळणार आहे.

शाळांमधील शिक्षकांची उपस्थिती, विद्यार्थ्यांची पटसंख्या आणि शिक्षणाचा दर्जा याची प्रत्यक्ष पाहणी करण्यासाठी शिक्षण विभागातील वरिष्ठ अधिकाऱ्यांनी अचानक शाळांना भेटी (Surprise Visits) द्याव्यात, अशा स्पष्ट सूचना सभापतींनी दिल्या. शाळांमध्ये गुणवत्तापूर्ण शिक्षणाची प्रभावी अंमलबजावणी होत आहे की नाही, याची नियमित तपासणी करण्यावर भर देण्यात आला.

जिल्ह्यात ज्या ठिकाणी शाळांची आवश्यकता आहे, त्या ठिकाणी नवीन शाळांच्या इमारती उभारण्याबरोबरच जुन्या शाळांच्या दुरुस्तीची कामे तातडीने हाती घेण्याचे निर्देश देण्यात आले. या कामांना गती मिळावी यासाठी आवश्यक ती कार्यवाही शिक्षण विभागाने थेट करावी, अशी भूमिका सभापतींनी मांडली.

केवळ भौतिक सुविधा उपलब्ध करून न थांबता विद्यार्थ्यांच्या शैक्षणिक गुणवत्तेत प्रत्यक्ष वाढ होण्यासाठी शिक्षक आणि केंद्रप्रमुखांनी विशेष प्रयत्न करावेत, असेही सभापतींनी सांगितले. डिजिटल शिक्षण, नाविन्यपूर्ण शैक्षणिक उपक्रम आणि विद्यार्थीकेंद्रित शिक्षणपद्धती यावर विशेष भर देण्याच्या सूचना देण्यात आल्या.

सभेला जिल्हा परिषद सदस्य सौ. वंदना कांबळे, कु. श्रुती भोरगुंडे, सौ. सोनाली बोधले, श्री. चंद्रकांत जाधव, श्री. विजयराज डोंगरे, श्री. शिवराज म्हेत्रे, नगराध्यक्षा मीनल साठे, श्री. शिवाजी कांबळे यांच्यासह शिक्षणाधिकारी श्री. मुळे, श्री. जगताप, श्री. शिंदे तसेच जिल्ह्यातील सर्व गटशिक्षणाधिकारी (BEO) उपस्थित होते.

चौकट 
“विद्यार्थ्यांची सुरक्षा आणि दर्जेदार शिक्षण हीच आमची प्राथमिकता आहे. धोकादायक इमारतींबाबत तातडीने कार्यवाही करून आवश्यक त्या ठिकाणी नवीन बांधकामे सुरू केली जातील. तसेच जिल्हा परिषदेच्या स्वतंत्र शिष्यवृत्ती योजनेमुळे ग्रामीण भागातील गुणवंत विद्यार्थ्यांना पुढील शिक्षणासाठी भक्कम आधार मिळेल.”
— श्री. चेतनसिंह केदार-सावंत, सभापती, शिक्षण समिती